من حكاوي ماما نجوي
نجوى إبراهيم قررت تعمل زيارة لسـجين المحلة.. لكن الزيارة دي انتهت بمشهد أبكى ناس كتير! محمد عبدالجليل اللي قضى 19 سنة خلف القضبان، ماكانش يعرف إن خروجه مش هو المفاجأة الوحيدة.. وإن فيه حضن مستنيه من 19 سنة، هيكون كفيل ينسّيه كل لحظة غياب!
الحكاية بدأت لما نجوى إبراهيم قررت تزور محمد في السـجن، الشاب اللي دخل القضبان وهو لسه في سن الإعدادية تقريبًا، لكن رغم صعوبة السنين، رفض يستسلم لليأس، وقرر يكمل تعليمه من جوه السجن لحد ما حصل على ليسانس آداب، وبدأ يستعد للماجستير.
محمد كان عنده حلم واحد مستنيه من سنين.. إنه يخرج ويشوف أمه وأخته تاني، لكن اللي ماكانش يعرفه إن نجوى إبراهيم كانت بتحضر له مفاجأة هتغير حياته بالكامل.
نجوى اتفقت مع مأمور السجن إن محدش يبلغه بحاجة، واستدعوه بحجة إنه يحلق دقنه ويلبس كويس، ولما دخل عليه المأمور قاله:
مبروك يا محمد.. أنت اتخرجت وأخدت الليسانس، وإحنا فخورين بيك.
لكن المفاجأة الأكبر كانت لسه جاية.. المأمور بصله وقاله:
أنت النهارده صدر قرار الإفراج عنك!
محمد فضل باصص له مش مصدق، وكأن عقله مش قادر يستوعب إن الكلمة اللي استناها 19 سنة بقت حقيقة أخيرًا. وكل اللي قدر يقوله من شدة المفاجأة:
متشكر يا باشا.
وبعد ما خلص إجراءات خروجه ولم حاجته ولف مرتبته، ركب الأتوبيس مع نجوى إبراهيم في طريق العودة للمحلة، عشان يوصلوه لبيت أهله.
لكن هنا ظهرت مشكلة ماكانوش عاملين حسابها.. محمد ماكانش يعرف غير عنوان بيته القديم اللي سابه من 19 سنة، ولما وصلوا اكتشفوا إن الدنيا اتغيرت، والشوارع اتبدلت، والبيوت مابقتش زي ما كانت.
