ادهم و نيهال ج٤
ادهم : حجات ايه دي بقا اللي مش هتعشيها عرفيني عليها كدا
نهال : يعني مثلا تسفرني جزر المالديف في جزيره لوحدنا الا ما سفرتني راس البر حتي يا اخي
ادهم ضحك بخفه وطلع سيجاره شربها : لاء دا انتي القصص اللي بتقرئي فيها دي مأثره عليكي علي الاخر الا جزر المالديف دي فين علي الخريطه
نهال بصتله : يعني فهد الفهود قال لازم تسافر بطياره يبقا اكيد بعيده
” ادهم ضحك وقرب علي نهال يب.وسها ، لكن نهال بعدت بضيق ”
نهال بضيق : ادهم ابعد ريحتك سجاير صعبه ايه داا أنا معرفش انت بتشرب سجاير ليه اصلا
ادهم بعد بستغراب : في الطبيعي ريحة السجائر مكنتش بتتعبك اشمعنا دلوقتي مش طايقه ريحتها ؟
نهال حطت أيدها علي بوقها وهي حسه أنها هترجع : معرفش بس ريحة السجاير مضيقاني ” وحست أنها خلاص هترجع مسكت ايد ادهم وغمضت عيونها ” ادهم وقف العربيه
ادهم وقف العربيه علطول وبصلها بقلق : مالك في ايه عايزه ترجعي ” نهال هزت راسها وادهم جابلها كيس ونهال رجعت ” يلعن ميتين اهلها سيجاره يشيخه اللي تعمل فيكي كل دا
نهال اخدت مناديل ومسحت بوقها وقالت بتعب : ادهم أنا مش قادره اروح الجامعه روحني
ادهم ضمها لصـ,,ـدره وقال بحنان : مش مشكله يقلبي تعالي هنروح نقعد علي البحر في المنصوره تشمي هوا شويه ” وشغل العربيه ومشي علي المنصوره وهو حض.نها لسه ”
……………………………..
” صلاح نايم ومراته جنبه سمعو صوت الجرس بيرن نوال فتحت عينها بضيق بصت علي صلاح اللي بدء يصحي ”
سلوي من برا : ايييه مش كفايه نوووم هتعفنو
صلاح بص لنوال وقال بابتسامه : صباح العسل
نوال ابتسمت اوي وقالت : صباح الخير انا هقوم انولها وبلاش مشاكل معاها من اول يوم
صلاح مسك ايدها : ولا في مشاكل اول يوم ولا اي يوم تاني محدش ليه كلمه عليكي غيري انا بس اللي امشي كلامي عليكي يا نوله
نوال بدون كلام قربت منه وحض.نته : ربنا يخليك ليا وتفضل ديما سندي وحمايتي
صلاح باس راسها : اوعي يابت بقا خليني اقوم ارد علي الدوليه اللي هتكس.ر الباب دي ” وقام فتح الباب لأمه ” صباح الخير يما
سلوي : صلاح الفل يقلب امك صحيتك ولا ايه ؟
صلاح بضحكه خفيفه : صحتي بس دا انتي صحيتي البيوت المجاوره كمان
سلوي : اعمل ايه نايمين وحاطين في بطونكم بطيخه صيفي واحده راحت علي الكليه من الصبح و التانيه لسه نايمه وانا صاحيه من النجمه بعلف البط وبعلف البهايم زي الخدامه
صلاح بابتسامه : وانتي عامله في نفسك كدا ليه ريحي نفسك وابويا قالك ميت مره هو اللي هيغلف البط والبهايم بس انتي مبتحبيش تريحي نفسك وان كان علي لقمتي أنا ومراتي احنا من النهارده هناك هنا في شقتي يغاليه
سلوي من صدمتها معرفتش ترد علي ابنها فضلت بصاله شويه وبعدين نزلت علي السلم : علي رأي المثل ربي يا خايبه للغايبه يا فرحتك في رجالتك يا سلوي
” صلاح فضل ينادي عليها ولكن هي مردتش عليه ولا عبرته ف قفل شقته ودخل علي جوه اتقابل في نوال اللي واقفه علي باب اوضة النوم ”
صلاح بضحك : واقفه كدا ليه يابت خضتيني
” نوال بكل تلقائيه راحت حض.نته وهي فرحانه أن وقف في وش امه عشانها ، صلاح حض.نها بحب كان مفتقده وحس بيه لما بعدت عنه ”
………………………………….
” ادهم ونهال قاعدين في كافيه علي البحر نهال بتشرب عصير مانجا وعماله تتكلم وادهم بيشرب كوباية قهوه وبيسمعلها ”
ادهم بستغراب : مش فاهم يعني انتي بتحبي الطبخ بس مبتعرفش تطبخي ؟!
نهال ببساطه : مره حد قالي مش شرط تكون بتعرف تغني وصوتك حلو علشان تغني انت بتحب تغني يبقي غني وكذالك برضو الطبخ مش لازم تكون بتعرف تطبخ علشان تطبخ انت بتحب تطبخ يبقي اطبخ واغلط مره واتنين والتالته هتتعلم ” وابتسمت ”
ادهم ابتسم وشرب شويه من فنجان القهوه وقال : ومين الحد اللي دماغه متكلفه دي ؟
نهال بصتله وابتسمت : جوووزي…تعرف احيانا بستغربه هو راجل عظيم جدا بنسبالي بيجي من برا يعلق هدومه مش بيرمي كل فردة شراب في مكان مثلا بيحضرلي الفطار ” وضحكت بخفه وادهم ضحك بحب ” مبيعلقش ليا علي حاجه حنين جدا فووق ما تتخيل بيستحملني وبيستحمل هبلي وعبطي بيطمني ديما
ادهم مد ايده مسك أيدها وباسها وقال : مراتي بقا مطلعه عيني ومجنناني وبتخليني عايز أشد في شعري بس رغم كل دا هي رقيقه وجميله ومثيره جدا ” وغمزلها وهي اتكسفت جدا ” أنا من الاخر مُغرم بيها
نهال بصتله وهي فرحانه اووي من جواها والفرحه دي واضحه علي ملامحها فقالت بكسوف : يا الله احرجتني والله يا ادهم
ادهم ابتسم وقال : ايه هواياتك المفضله او مثلا ايه الحجات اللي بتحبيها ؟
نهال بدون تفكير : النوم ” وضحكت وهو ضحك ” بحب البحر بس مبعرفش اعوم
ادهم ضحك : انتي غريبه اووي يعني بتحبي الطبخ بس مبتعرفش تطبخي وبتحبي البحر بس مبتعرفش تعومي كل حاجه علي نقيض حاجه تانيه
نهال لسه هترد قالت شافت مولتن كيك علي الطربيزه اللي قدامها بصت لأدهم اللي مستغرب رأكشنات وشها : ادهم انا عايزه مولتن كيك ومعاه ايس كريم
ادهم ابتسم وطلب مولتن كيك وايس كريم : بتحبي الحلاويات ؟
نهال مسكت فونه وفتحت الكاميرا علشان يتصورو وقالت : جدااا يلا نتصور مع بعض ” واتصورو صور جميله اوي ”
ادهم قام وقف وطلب الشيك ودفع حقه : ايه رأيك نتمشي شويه مع بعض
نهال وقفت ومسكت ايده بابتسامه : موافقه جداا هتمشيني فين ؟
ادهم مسك أيدها ومشيو : يعني نتمشي في أي مكان ناقصك حاجه نجيبها كدا يعني
نهال بابتسامه : عايزه مناكير وعايزه روج احمر علشان معنديش
ادهم همسلها : أنا سمعت أن في روج بالاطعمه ما تيجي نجيبه نجربه
نهال قرصته بغيظ وقالت : اتلم بعدين انت قولت حجات ليكي ودا ليك انت أنا بس يدوب هحطه في البيت لكن أنا عايزه روج خروج
ادهم بضحك : أنا وانتي واحد يقلبي ” ودخلوا علي محل مستحضرات تجميل ” شوفي انتي عايزه ايه ومتنسيش الروج اللي بالاطعمه أنا بحب البطيخ
” نهال ابتسمت وفضلت تختار حجات هي عايزاه وطبعا جابت الروج اللي بالاطعمه ”
ادهم واقف علي الكاشير بيحاسب مال علي نهال وقال بهمس : مش كان صباع روج وعلبة مناكير امال أنا شايف عطور وحجات غريبه ليه ؟
نهال بلطف : ادهم دي حجات نقصاني وانا عايزاها والله ” وقالت بهمس ” وجبتلك روج بالاطعمه
” ادهم دفع الحساب واتفاجئ بالسعر وخرج هو ونهال اللي مبسوطه بالحجات اوي ”
ادهم : بقا شوية الحجات دي ادفع فيهم ٩٠٠ جنيه ؟
نهال مسكت ايده : مركات بقا يقلبي بعدين ربنا يخليك ليا وتجيبلي كمان وكمان
ادهم بقلة حيله وهو بيفتح العربيه : هقول ايه كله علي الله المهم مش جيبتي روج بالأطعمة اهم حاجه
نهال ركبت : جبته جبته متقلقش
ادهم بفرحه : نروح بقا علشان نلحق ندوق الاطعمه كلها
………………………………………………
نوال كانت بتغير هدوم بنتها لقت فونها بيرن برقم غريب استغربت في البدايه لكن ردت : الوو سلام عليكم
“” انتظرو القادم “”
الفصل التاسع والعشرون 29
نوال استنت اللي علي الفون يرد لكن مفيش رد فقالت بستغراب : الووو ” برضو مفيش رد فقفلت الفون وكملت لبس غزل ” امسكي الكم اللي تحت يلا
غزل مسكت كمها وامها لبستها البجامه اللي فوق : ماما هو احنا مش هنرجع عند عمو امجد تاني
نوال بصت لبنتها بصدمه وكذا حكايه اتصورت في عقلها لو صلاح عرف أنها كانت قاعده عند امجد في بيته وهي مصدقت أن علاقتها اتصلحت معاه وقالت : غزل سيرة عمو امجد دي متجيش هنا خالص علشان نفضل قاعدين عند بابا علطول ولا انتي عيزانا نمشي
غزل برفض : لاء نفضل هنا منمشيش تاني
نوال بابتسامه : يبقي متقولش أننا عرفنا عمو امجد ولا شوفناه ابدا تمام
” غزل هزت راسها بموافقه وسكتت ونوال سرحتلها شعرها لكن دماغها مشغوله ولسه متعرفش امجد هيعمل ايه لما يعرف أنها مشيت بس الاكيد انها منتظره أي ردة فعل ، ولسه متعرفش ادهم ناوي يعمل معاها ايه او هيواجهها ازاي ”
نوال باستها وقالت : الجميل بقا جميل وريحته قمر يلا العبي علي ما اجهز الغدا
غزل بستغراب : فين الغدا هنا ولا تحت عند تيتا ؟
نوال ابتسمت علي استغراب بنتها : لاء هناكل هنا علطول مفيش اكل عند تيتا تاني
” غزل هزت راسها و قعدت تلعب ونوال دخلت المطبخ تجهز الغدا وهي قلقانه من امجد وخايفه صلاح يعرف حاجه ”
…………………………………
” ادهم رجع من المنصوره هو ومراته ووقف العربيه قدام البيت وبص لنوال علشان تنزل لكن هي بصاله بتركيز استغربه ”
ادهم ضم بين حواجبه : مالك بتبصيلي كدا ليه انزلي يلا
نهال : ادهم انت ممكن تطلقني بسبب خناقه من اللي احنا بنتخانقهم دي ؟
ادهم مسح وشه وقال بتعب : يالله… أنا ايه اللي عملته في نفسي دا بس جواز ايه اللي أنا كنت رايح اتجوزه ما أنا كنت عايش حياتي مبسوط ليه عكننت علي نفسي
نهال طبطبت علي صـ,,ـدره بتأثير : معلش يا ادهم هو كدا المومن ديما مصــ,,ـاب….بس رد علي سؤالي وكمل عكننه
ادهم بصلها كتير بغيظ وقال : أنا راجل مش بتاع طلاق ” ومسك أيدها ” ام الدبله دي انتي مش هتقلعيها مهما حصل هتفضلي علي ذمتي لحد يا امو.ت يا انتي تمو.تي يلااااا انزلي بقا
نهال ابتسمت اوي وهي فرحانه بكلامه ونزلت من العربيه وقالت بهمس : ياااربي والله طلع كلامه شبهه الروايات ” وطلعت علي البيت وهي فرحانه ”
ادهم قاعد في العربيه يبصلها بذهول : اقسم بالله العظيم متخلفه عقلياً ” وقال بابتسامه ” كان ايه هيحصل لو الواحد اتجوز واحده خرسه وطرشه يقول اللي يقوله وهي تبتسمله وبس ياااااه دا الواحد انبسط من مجرد التخيل ” ونزل من عربيته ”
“سلوي كانت قاعده في الصاله ورابطه دماغها وواضح عليها انها معيطه ، نهال دخلت اتفجأت بشكلها ”
نهال بستفسار : استر يارب مالك رابطه دماغك ليه كدا
سلوي بصتلها من فوق لتحت وقالت : يلااااا جُري جوزك وراكي واطلعي شقتك واقفلي عليه بسبع ترابيس انتي كمان
نهال قلعت شنطتها وراحت قعدت جنبها : صلِ على النبي في قلبك بس كدا وفهميني ايه اللي حصل عايزاني اجره ورايا واقفا عليه بترباس ليه
سلوي بنواح : الواحده تحبل وتولد وتربي لحد ما حباية عينها تطلع برا علشان تقول أنا أم الرجاله اول ما يتجوز مراته تقويه علي أمه
نهال طبطبت عليها وقالت بمرح : يشيخه قولي كلام غير دا انتي حد يعرف يستقوي عليكي انتييي
سلوي بصتلها بغضــ,,ـب : قصدك ايه بكلام دا ليكون معلقلكم المشنقه يابت وانا مش واخده بالي
نهال حاولت تبرر كلمتها فقالت : لاء اكيد مقصدش انك وليه قادره يعني انتي بس شديده شويه عايزه واحده تكون صحتها حلوه تحت ايدك طول النهار واحنا مفيناش صحه والله يعني انتو زمان كنتو بتفطرو فطير مشلتت بالسمنه البلدي ف الواحده فيكم كانت تهد جبل إنما احنا جيل الاندومي والانيميا الحاده……المهم يعني بتقولي الكلام دا ليه ايه اللي حصل ؟
سلوي بضيق : الحيه مرات صلاح طول الليل بتسمع الواد كلام من نحيتي لحد ما خليته مش شاهيني قدام عينه طلعت الصبح علشان اصحيهم يفطرو يقولي أنا ومراتي هنالك من هنا ورايح في شقتي قولت علي رأي المثل ربي يا خايبه للغايبه
نهال بدهشه وابتسامه : بالله العظيم قالك كدا اقسم بالله راااجل
سلوي بغضــ,,ـب : انتي عماله ترمي كلام من تحت لتحت كدا ليه يما انتي كمان مضايقه خدي بعضك واطلعي علي شقتك واتقسمي وانا أن كان علي سالم هأكله واشربه وهنعيش مبسوطين بلا وجع دماغ
نهال بابتسامه : جدعه بلا وجع دماغ سيبي اللي ينام ينام واللي ياكل ياكل متتعبيش نفسك وانتي هتعوزي ايه غير سعادة عيالك يا ام ادهم
ادهم دخل قعد جنب أمه بإرهاق وبصلهم الاتنين بستغراب : في ايه مالكم ؟
نهال قامت وقفت : طيب هسيبكم تحلو شوية المشاكل العائليه دي علي ما اطلع اخد شاور ” وطلعت علي شقتها جري ”
ادهم بزعيق : متجريش علي السلم يابت اللي في بطنك هينزل ” وبص لأمه اللي لويت بوقها وهو ضحك وفضلت تشكيله ”
……………………………………
” نهال طلعت شقتها قلعت الكوتش كل فرده في مكان وقلعت الجاكت بحماس وفتحت شنطتها طلعت كيس الميكب ودخلت علي اوضة النوم ”
نهال بحماس : انا جبت روج بطعم الفلفل الحرااااااااااق اديلووو ادي يابت يا نهووووول ” وراحت وقفت قدام المرايا وفتحت الروج وبصتله بحماس وبدأت تحط علي شفايفها ”
” نهال حست بحر.قان في شفايفها بسيط بس كل شويه بيزيد جابت منديل ومسحت شفايفها بسرعه لكن الحر.قان زاد ”
نهال غسلت شفايفها بس اول ما المايه جت علي شفايفها صوتت : لاااء مش المفروض أنا اللي اتوجع المفروض هوووو
ادهم فتح باب الحمام وشاف شفايفها حمرا جدا : ايييه دا عملتي ايه في بوقك ؟
نهال دموعها نزلت وهي ماسكه شفايفها : الروووج اللي عمل فيها كدا بتحر.قني يا ادهم
