رجّعتله فلوسه
كنت كل ما أشوف اسمها على شاشة الموبايل أفتكر شكلها وهي قاعدة قدامي، وأفتكر الموقف اللي حصل، وأحس إني مش قادر أتجاوز الموضوع. تاني يوم والدتها اتصلت بيا، وقالتلي إنها عايزة تفهم إيه اللي حصل وليه اتكلمت مع بنتها بالطريقة دي قدامها وقدام أخوها.
قولتلها: «أنا معنديش مشكلة مع مريم كشخص، لكن اللي حصل ضايقني جدًا، وأنا مش شايف إن ده تصرف طبيعي من واحدة داخلة على جواز.» قالتلي: «يا كريم، البنت بتشتغل وبتتعب، وبتحاول توفر فلوس عشان تجهز نفسها، وإنت عارف إن أبوها متوفي وإن مفيش حد شايل مسؤوليتها غير نفسها.
كان ممكن تكلمها بينك وبينها بدل ما تحرجها قدامنا.» الكلام ضايقني، ورديت عليها إن الموضوع مش مجرد موقف عابر بالنسبة لي، وإن دي حاجة أساسية في حياتي ومش هقدر أتنازل عنها. الكلام بينا طول، وفي النهاية وصلنا إن الخطوبة مش هتكمل.
أنا طلبت إن كل حاجة تخصني ترجع، وقلت إن مفيش داعي يبقى فيه أي تواصل بين العيلتين بعد كده. يوم التلات، والدتي راحت بيتهم عشان تاخد الحاجات. مريم فتحتلها الباب واستقبلتها باحترام، وبدأت تطلع الحاجات اللي كانت عندها وتحطها في شنطة.
والدتي سألتها عن الموبايل، فقالتلها: «الموبايل هرجعه طبعًا، بس محتاجة شوية وقت لحد ما أقدر أوفر تمنه.» أمي استغربت وسألتها: «ليه يا بنتي؟ هو مش معاكي الموبايل؟» قالتلها: «أيوه، بس الموبايل عليه صوري وحاجات شخصية تخصني، وكمان أنا بستخدمه في شغلي.
مش بقول إني مش هرجعه، أنا هرجع تمنه، بس ادوني فرصة أدبر الفلوس وأجيب موبايل تاني.» أمي قالتلها إن تمنه سبعة آلاف جنيه، وإن الأفضل إنها ترجعه أو تدفع تمنه، وإن الموضوع مينفعش يفضل مفتوح. مريم ردت بهدوء: «أنا مش بتهـ,ـرب من حقه، وهجيب الفلوس، بس مش معايا المبلغ دلوقتي.
» والدتي رجعت البيت وحكتلي كل اللي حصل، وأنا مكنتش راضي عن التأجيل، لكن قلت أديهم كام يوم يمكن يدبروا المبلغ. عدت أيام، ومفيش أي اتصال منهم، ولا حد سأل عن الفلوس، ولا حتى حاول يحدد ميعاد للرجوع.
بدأت أحس إنهم بيطنشوني، وإن مريم مش ناوية ترجع تمن الموبايل، فقررت أفك الحظر عنها وأبعتلها رسالة. كتبتلها: «أنا مستني السبعة آلاف جنيه بتوع الموبايل، ومش هفضل مستني كتير. لو الفلوس موصلتليش، هاجي بنفسي وأعمل مشكلة وفضيحة ليكي ولأمك وللعيلة كلها.
» بعد شوية لقيتها ردت عليا: «متقلقش، هجيبلك الفلوس حتى لو اضطريت أستلفها، وأنا عايزة أخلص من الموضوع ده ومنك خالص.» اتعصبت من طريقة كلامها، لكن في نفس الوقت استغربت إصرارها إنها ترجع الفلوس بسرعة، خصوصًا إنها كانت بتقولي إن الموبايل ضروري جدًا لشغلها، وإنها مش قادرة تستغنى عنه دلوقتي.
فضلت أفكر في الموضوع، وافتكرت كلامها لأمي يوم ما راحت تاخد الحاجات، وإنها قالت إنها محتاجة الموبايل عشان عليه حاجات شخصية تخصها، وإنها بتستخدمه في شغلها. وقتها بدأت أسأل نفسي: لو هي فعلًا ظروفها صعبة للدرجة دي، وبتشتغل أكتر من 11 ساعة عشان توفر فلوس جهازها، هتقدر تجيب سبعة آلاف جنيه في كام يوم منين؟
وليه كانت مصممة تحتفظ بالموبايل لحد ما تدبر تمنه؟ بعدها بيومين، أمي كانت قاعدة معايا في البيت، وفجأة قالتلي: «على فكرة يا كريم، أنا من يوم ما روحت عند مريم وفي حاجة شاغلة بالي.» سألتها: «إيه اللي حصل تاني؟
