رجّعتله فلوسه

الجزء الاول روحت أزور خطيبتي، وأول ما قعدت جنبها لاحظت ريحة غريبة وإهمال شديد في نضافتها الشخصية، فقولتلها قدام أمها: «إنتِ إزاي قابلة على نفسك تبقي بالشكل ده؟ إنتِ إنسانة معفـ,ـنة!» لكن لما فسخت الخطوبة وطلبت منها ترجع الموبايل اللي جبتُهولها، أمي راحت تاخد حاجتي ورجعت تحكيلي عن طلب غريب طلبته منها خطيبتي!

أنا اسمي كريم، عندي 29 سنة، وكنت خاطب من عيد الفطر لبنت اسمها مريم. مريم بنت يتيمة، والدها متوفي من سنين، وعايشة مع والدتها وأخوها الصغير، وكانت بتشتغل في شركة خاصة عشان تصرف على نفسها وتساعد أمها في مصاريف البيت.

أنا من أول ما اتعرفت عليها كنت عارف إن ظروفها مش سهلة، وكنت مقدّر إنها بتتعب في شغلها وبتحاول تعتمد على نفسها. وعشان كده كنت بحاول أساعدها على قد ما أقدر، وكنت بجيب لها حاجات كتير محتاجاها، حتى الموبايل اللي معاها أنا اللي جبتُهولها هدية في عيد ميلادها، وكان تمنه سبعة آلاف جنيه.

في البداية كانت علاقتنا كويسة، ومكنش بينا مشاكل كبيرة، وكنت فاكر إننا متفاهمين وإن الجواز مسألة وقت. لكن في يوم روحت أزورها في بيتهم، وكنت متوقع إننا نقعد نتكلم شوية زي كل مرة. أمها استقبلتني، وقعدنا في الصالة، وبعد شوية مريم خرجت من أوضتها وقعدت جنبي.

أول ما قربت منها لاحظت ريحة مش لطيفة، وحاولت أتجاهل الموضوع في الأول، لكن لما اتحركت قدامي لاحظت إن فيه إهمال واضح في نضافتها الشخصية، حتى شعر رجليها كان ظاهر فوق الكعب. بصيتلها باستغراب، وقلت لها: «إيه ده يا مريم؟ إنتِ إزاي سايبة نفسك كده؟

» بصتلي وقالت: «في إيه يا كريم؟» قولتلها وأنا متضايق: «إنتِ مش واخدة بالك من نفسك خالص؟ وبعدين إيه الريحة دي؟ إنتِ مش مهتمة بنضافتك الشخصية ليه؟» وشها اتغير، وبصت ناحية أمها اللي كانت قاعدة قصادنا، وبعدها قالتلي بصوت واطي: «أنا آسفة، والله لسه راجعة من الشغل، وتعبانة جدًا.

بقالي أكتر من 11 ساعة بره البيت، ومخدتش بالي من نفسي.» لكن أنا مكنتش مقتنع بكلامها، وبدل ما أهدى، صوتي علي أكتر وقلت: «يعني إيه مخدتيش بالك؟ هو التعب يخلي الواحد يهمل نفسه بالشكل ده؟ ده أنا شوفت جزء من رجلك فوق الكعب ولقيت فيه شعر، والريحة دي مش طبيعية!

أمال لو شوفت باقي جسمك هلاقي إيه؟» مريم سكتت، وعينيها اتمَلَت دموع، وأمها اتحركت من مكانها وقالتلي: «يا ابني معلش، البنت فعلًا بتتعب في شغلها، وإنت عارف ظروفها.» رديت عليها: «أنا مقدّر تعبها، لكن فيه حاجات أساسية مينفعش الواحد يهملها، وأنا مش هقدر أكمل حياتي مع واحدة مش مهتمة بنفسها.

» مريم حاولت تتكلم وقالت: «أنا اعتذرتلك يا كريم، والله مش قصدي أضايقك، ومش هيتكرر تاني.» لكن أنا كنت خلاص أخدت موقف، وقومت من مكاني وقلت إن مفيش داعي نكمل الكلام، وخرجت من البيت من غير حتى ما أديها فرصة تشرح أكتر.

طول الطريق وأنا بفكر في اللي حصل، وكنت مقتنع إني عندي حق، وإن الاهتمام بالنضافة الشخصية مش رفاهية ولا حاجة مرتبطة بالفلوس أو ظروف الشغل. بالليل مريم حاولت تتصل بيا أكتر من مرة، وبعتتلي رسايل بتعتذر فيها، لكن أنا مردتش.