
سر العقد
جوزها مردش عليها، وكمل كلامه وهو بيبص للناس أنا لقيت العقد ده مخبي في دولاب العيال عندنا. وخلوني أقولكم حاجة، أنا أصلاً مجبتش لمراتي العقد ده، ولا عمري شفتها لابساه قبل كده.
الكل بدأ يبص لبعضه باستغراب، وهو كمل كنت هسألها جابته منين، لكن قبل ما أتكلم معاها سمعتها بالصدفة وهي بتتكلم مع أختها ريهام في التليفون، وبتحلفلها بعيالها إنها ماخدتش العقد!
سلوى حاولت تقاطعه أحمد، اسكت بقى، مش وقته الكلام ده!
لكنه رفع إيده وقال لأ، وقته! أنا سكت كتير، لكن مش هسكت على حاجة زي دي. وقتها عرفت إني متجوز واحدة مش بتقول الحقيقة وبتحتفظ بحاجات مش بتاعتها، وبدل ما أسيبها تخبي العقد وتتصرف فيه، قررت أرجع الحق لأصحابه. وانهارده بدلت الهدية اللي كنا مجهزينها وحطيت العقد مكانها.
في اللحظة دي، حسيت إن كل العيون اتوجهت ناحية أختي.
الهمس بدأ ينتشر بين الضيوف، وكل واحد بيقول كلمة للتاني.
حماتي اللي كانت قاعدة من أول
الليلة بتراقب كل حاجة، قالت بصوت مسموع يا ساتر يا رب! ويا ترى العيلة كلها مش محل ثقة ولا الأخت بس؟
وشي احمر من الإحراج، وحسيت إني نفسي الأرض تنشق وتبلعني أنا وأمي.
لكن جوزي اتدخل بسرعة وقال لأمه ماما لو سمحتي، خلاص. الموضوع بين أصحاب الشأن، ومش عايزين حد يغلط في حد.
أما أمي فكانت قاعدة مش قادرة تنطق، ودموعها متجمعة في عينيها. كانت طول عمرها بتقول إن سلوى الكبيرة وعاقلة، وإنها سند أختها الصغيرة، لكن النهارده اكتشفت إن بنتها عملت حاجة خلتها مش عارفة ترفع عينيها في وش الناس.
سلوى قامت من مكانها وجريت ناحية جوزها، ومسكته من إيده وهي بتعيط أحمد، اسمعني بس، أنا آسفة والله، أنا مش عارفة إزاي عملت كده، بس العقد شكله غواني، وأنا لما شوفته عند ريهام مقدرتش أقاوم نفسي. كنت ناوية أرجعه، والله كنت ناوية!
بص لها أحمد بحزن وقال يعني إنتِ معترفة إنك خدتيه؟
سلوى سكتت وبدأت تعيط أكتر.
قالها والأصعب من أخذ الحاجة إنك حلفتي كلام مش حقيقي، وحلفتي بعيالك كمان، وخلتي أختك تعيش أيام في قلق وحيرة من جوزها. إنتِ عارفة أنا بقيت أفكر في إيه؟ بقيت خاېف أسيب حاجتي في البيت وأنا مطمن!
حاولت تمسك إيده تاني وقالت أرجوك يا أحمد، سامحني، أنا غلطت ومش هكررها أبداً.
لكنه سحب إيده منها وقال بصوت حاسم إنتِ طالق. أنا مقبلش أعيش مع واحدة مش بتقول الحقيقة، ولا أقدر أبني بيت مع إنسانة مش عارف أصدق كلامها بعد كده.
بكت سلوى وقالت والنبي يا أحمد، متعملش فيا كده! فكر في عيالنا!
لكنه أخد مفاتيحه وخرج من الشقة من غير ما يبصلها.
فضلت سلوى واقفة مكانها بتعيط، وأمي راحت ناحيتها تحاول تهديها، لكن هي نفسها كانت في موقف صعب ومش قادرة تواجه حد.
أما أنا، فكنت واقفة جنب جوزي، باصة للعقد اللي رجع قدامي بعد كل التعب اللي عشته بسببه.
مكنتش فرحانة باللي حصل لأختي، ولا كنت أتمنى بيتها يتفكك، لكن كنت موجوعة من فكرة إنها كانت مستعدة تخسرني وتخسر ثقة جوزها فيها عشان قطعة دهب.
جوزي قرب مني وحط العقد في إيدي وقال خدي يا ريهام، ده حقك، ومش عايزك تزعلي تاني.
مسكته وأنا دموعي بتنزل، وقلتله أنا مش مصدقة إن اللي حصل ده كله كان بسبب أختي.
رد عليا اللي يوجع مش ضياع الحاجة، اللي يوجع إنك تكتشفي إن أقرب الناس ليكي ممكن يزعّلوكي بالشكل ده.
الناس بدأت تمشي واحدة ورا التانية، والاحتفال اللي كنا محضرين له من أيام انتهى في لحظات، وأمي خرجت وهي مسنودة على أخوها، وسلوى خرجت من غير ما ترفع عينيها في عين حد.
أما أنا، ففضلت واقفة أبص على الترابيزة اللي كانت مليانة أكل وهدايا من شوية، وبقيت شايفة قدامي مشهد أختي وهي بتاخد العقد من بيتي وبتنكر، ومشهدها وهي بتواجه نتيجة تصرفها قدام الكل.
كان المفروض اليوم ده يبقى أسعد يوم في حياتي، يوم عيد جوازي اللي استنيته وحضرتله وفرحت بيه، لكنه اتحول ليوم مش هنساه طول عمري.
يوم عرفت فيه إن مش كل اللي بيضحك في وشك بيحبك، وإن الطمع ممكن يخلي الإنسان يخسر أغلى حاجة عنده، حتى لو كانت أخته اللي عمرها ما تخيلت إنها ممكن تكون سبب زعلها.
ومن يومها، رجع العقد لمكانه، لكن الثقة اللي اتكسرت بيني وبين سلوى عمرها ما رجعت زي الأول.
وده كان يوم عيد جوازي… اليوم اللي رجع فيه عقدي، لكن اتفككت فيه عيلة كاملة بسبب الطمع والكذب.





