
سر العقد
اختي جت تزورني ولما شافت العقد الغالي اللي جوزي جابهولي من الكويت انبهرت بيه ويومها العقد اختفى ، انا كنت متاكده انها اخدته، بقيت اتحايل عليها ترجعه قبل ما جوزي يعرف، بس هيه بقت تحلف بكل اللي ليها انه مش معاها ، لحد اللي حصل يوم عيد جوازي كان موقف صعب متصورتهاش في اسوء كوابيسي !!!
جوزي جابلي عقد غالي جدا وهو راجع من شغله في الكويت، ومفيش حد شافه إلا وانبهر بيه من حلاوته.
في يوم أختي الكبيرة سلوى جات عندي البيت زي كل مرة مع عيالها، وفضلت قاعدة معايا، وطلبت مني أوريهولها. أول ما مسكته في إيدها عينيها لمعت بطريقة غريبة وبقت تقيسه قدام المراية ومش عايزة تسيبه خالص، وتقولي ده أجمل حاجة عينيا شافتها في حياتي.
ضحكت وسيبتها في الأوضة ودخلت المطبخ أعملها عصير فريش. وأنا واقفة في المطبخ نادت عليا بصوت عالي وقالتلي بقولك يا رهوم، جوزي لسه متصل بيا حالا وقال لي إنه خلص شغل وراجع البيت ضروري وعايزني أمشي حالا.
جريت على بره لقيتها بتلم شنطها وعيالها في استعجال شديد ومستعجلة جداً، ودعتني ومشيت في ثواني.
أنا أصلاً
مخدتش بالي لأي حاجة، وعدا اليوم ده عادي جداً كأي يوم طبيعي.
تاني يوم الصبح بدأت أروق الشقة وأمسح التراب من على التسريحة. جيت أشيل علبة العقد عشان أنظف تحتها، حسيتها خفيفة جدا فتحت العلبة واتصدمت .. العقد مكنش جواها! فضلت أدور في كل ركن في الأوضة وتحت السرير وفي الدولاب وأنا بدعي ربنا ميكونش اللي في بالي صح، بس للأسف مكنش موجود في أي حتة كأنه فص ملح وداب.
مستحملتش، مسكت تليفوني واتصلت بسلوى فوراً لأنها الوحيدة اللي دخلت الأوضة دي ولمسته. أول ما ردت قلتلها بصوت مذهول سلوى، العقد فين؟ العقد اختفى من التسريحة ومحدش دخل البيت غيرك، رجعيه يا سلوى.
سمعت صوتها اتقلب واتعصبت وقالتلي بانفعال انتي بتتهميني أنا بأخذ حاجة مش بتاعتي يا ريهام؟! أنا غلطانة أصلاً إني جيت زرتك ودخلت بيتك! وقعدت تقفل في وشي الكلام وتزعق.
رجعت دورت في الشقة كلها تاني وتالت على أمل ألاقيه مرمي هنا أو هنا بس مفيش فايدة.
وجه بالليل، جوزي قالي إنه عايز ياخدني عيد ميلاد بنت أخته، وقالي البسي العقد اللي جبتهولك عشان تفرجيه للناس كلهم ويشوفوه عليكي.
ريقي نشف مكنتش قادرة أقوله إن أختي أخدته وأطلع عيلتي بالمنظر الژبالة ده قدامه.
لبست فستاني ولبست العيال ونزلنا من غيره. ولما سألني باستغراب هو فين، قلتله بلخبطة أصله تقيل جدا ومش مناسب لمناسبه بسيطة زي دي . ضحك وقالي براحتك يا ستي، وعدت الليلة بس كنت على أعصابي.
أول ما راح شغله الصبح تاني يوم، جريت مسكت التليفون واتصلت بسلوى تاني وأنا قلبي مليان قلق من كتر العياط. قلتلها يا سلوى حرام عليكي، جوزي لو عرف والله العظيم هيزعل وهنطلع في نظره ناس مش محل ثقة، ويمكن يمنعني ان أهلي يدخلوا البيت.. ارجوكِ رجعيه وأنا والله ما هفتح بوقي بحرف واحد مع أي مخلوق. فضلت تحلف بكل غالي عليها وبكل يمين وتقولي والله ما معايا، هو أنا هخبي عليكي حاجة؟ وبعدين طالما دي نظرتك فيا، خلاص يا ريهام أنا مش هاجي عندك تاني وقطعت الخط في وشي.
كنت متضايقة من القهر، اتغاظت واتصلت بماما حكيتلها اللي حصل وهي بعيط.
ماما اتخضت وقالتلي اهدي يا بنتي، وأنا هتكلم معاها بنفسي وأفهم منها .
بعد شوية ماما رجعت اتصلت وقالتلي بحيره والله يا بنتي كلمتها وحلفت لي باغلى ما عندها إنها مأخدتش حاجة وإنها بريئة انتي دورتي كويس يا سلوى ؟
نزلت دموعي وقلتلها دورت دورت والله أعمل إيه دلوقت يا ماما؟ أقول لجوزي أقوله أختي أخدت حاجتي؟ ده أنا مش هقدر أرفع عيني في وشه تاني .
ماما قالتلي اهدي واحاول اخبي الموضوع على قد ما اقدر وهي هتروح تتكلم معاها وجهاً لوجه.
عدا يومين والوضع زي ما هو، أختي مصرة على حلفانها وجوزي طلب مني نخرج نتعشى بره لوحدنا. وبرده طلب مني ألبسه، ورفضت بنفس الحجة، وبص لي باستغراب وحزن وقالي هو العقد مش عاجبك يا رهوم ولا إيه؟ كل ما أقولك البسيه تتهربي!.
قلتله بتوتر وأنا قلبي مليان قلق لا والله أبداً بس خاېفة عليه ليتخربش أو يضيع في الزحمة.
مشي معايا وهو مش مقتنع بكلامي وشاكك في طريقتي.
لحد ما بقى الأمر إجباري وخلاص مفيش مفر. بعد أسبوع بالظبط كان ميعاد عيد جوازنا، وكان جوزي بيحضر لعزومة كبيرة في البيت عندنا، وعازمين العيلة كلها عيلة جوزي وعيلتي بما فيهم سلوى وجوزها.
جه جوزي الصبح وقالي بجدية وأمر النهارده العقد هيتلبس ومتقوليش لا، أنا اشتريته عشان تلبسيه في المناسبة دي بالذات. هزيت راسي بالموافقة
وأنا قلبي مليان قلق.
فضلت طول اليوم وأنا بتصل على سلوى وتليفونها مقفول أو بتكنسل. لحد بالليل، جهزت ولبست لبس العزومة واتصلت بيها تاني.
ردت بضيق وقالتلي فيه إيه تاني يا ريهام زهقتيني؟، قلتلها بدموع ورجاء أبوس ايدك بلاش تحرجيني قدام أهل جوزي.. حماتي لسانها طويل وما هتصدق ، هاتي العقد معاكي وأنتِ جايّة وتعالي بدري شوية بالله عليكي.
ردت وقالتلي أنا معرفش أنتِ إيه، كل شوية تتهميني اتهام باطل والعقد مش معايا، ولولا إن جوزي صاحب جوزك وعايز يحضر النهاردة مكنتش جيت أصلاً.. سلام..وقفلت في وشي.
نزلت دمعة حاړقة على خددي بس مسحتها بسرعة لما الباب خبط، وجرى جوزي يفتح وكانوا أهله وصلوا.
وبدأت بعدها الناس تيجي وتملى الشقة، وجوزي كل شويه يخبط يستعجلني ولقيت نفسي مجبرة أخرج من الأوضة والعقد مش في رقبتي.
اول ما جوزي شافني قرب مني وسط الضيوف وهمس في ودني بصوت منزعج فين العقد؟! مش قلتلك البسيه؟!.
ساعتها بصيت بعيون مکسورة لاختي سلوى اللي كانت واقفة بهدوء وسط كل الناس.. واللي حصل بعدها كان موقف صعب بكل المقاييس، حاجة متخيلتش اعيشها ابدا!
!!!!
فضلت واقفة قدام جوزي ومش عارفة أرد عليه، وكنت حاسة إن رجلي مش شايلاني من كتر القلق والإحراج. بصيتله وقلت بصوت واطي
ممكن تيجي معايا الأوضة دقيقة؟ عايزة أقولك على حاجة.
بصلي باستغراب، وبعدها استأذن من الضيوف ودخل ورايا. أول ما قفل الباب، مقدرتش أتمالك نفسي وبدأت أعيط بشدة.
قالي بقلق في إيه يا ريهام؟ مالك؟
قلتله وأنا بمسح دموعي العقد مش معايا يا حبيبي… العقد ضاع، وأنا من يوم ما اختفى وأنا بدور عليه في كل حتة ومش لاقياه. أنا عارفة إنك هتزعل مني، وعارفة إنك جايبهولي من الكويت وتعبت عشان تفرحني بيه، بس والله ما كنت أقصد أضيعه.
وبدأت أحكيله كل اللي حصل من أول زيارة سلوى، وإنها كانت آخر واحدة شافته، وإنها طلبت مني أوريهولها وفضلت تقيسه قدام المراية، وبعد ما مشيت اكتشفت إنه اختفى.
وقلتله إني اتصلت بيها أكتر من مرة، وطلبت منها ترجعه لو كان معاها، لكنها فضلت تحلف إنها مخدتوش، وإن ماما كمان كلمتها وحلفت قدامها.
كنت مستنية ينفعل في وشي، أو يزعق ويقولي إزاي تفرطي في حاجة غالية بالشكل ده، لكنه فاجأني لما مسك إيدي وقال بهدوء
طب إنتِ ليه مقولتليش من الأول؟
بصيتله بصدمة، فقال
يا ريهام، أنا جوزك، يعني المفروض أول ما يحصل معاكي حاجة زي دي تيجي تحكيلي. متقلقيش، أنا مش هزعقلك ولا هحاسبك على حاجة إنتِ مش عارفة هي راحت فين.
قلتله وسط دموعي بس أنا قلقة تكون سلوى أخدته، ومش عايزة أتهم أختي من غير دليل، وفي نفس الوقت مش قادرة أصدق إن العقد اختفى لوحده.
رد عليا خلاص، متقلقيش. أنا مش هتكلم دلوقتي عشان شكل أختك قدام أهلي، وإحنا مش عايزين نكبر الموضوع قبل ما نتأكد من كل حاجة. هنسيب الليلة تعدي، وبعدها نبقى نحل الموضوع بهدوء.
وبعدين بصلي وقال ولو حد من أهلي سألك ليه مش لابسة العقد، قولي ببساطة إنه اتقطع وخلاص، ومحدش له دعوة.
حسيت وقتها إن حمل تقيل اتشال من على قلبي. كنت متوقعة إني ألاقي نفسي لوحدي في المشكلة دي، لكن جوزي وقف جنبي واحتواني بدل ما يلومني.
حضنته وقلتله ربنا يخليك ليا، أنا مش عارفة كنت هعمل إيه لو كنت زعلت مني.
ابتسم ومسح دموعي وقال يلا بقى، امسحي وشك واطلعي، النهارده عيد جوازنا ومش عايز أشوف دموعك تاني.
وبالفعل غسلنا وشنا وخرجنا، ومسك إيدي قدام الناس وبدأنا نستقبل الضيوف ونحتفل.
كانت القعدة مليانة ضحك وكلام، وأهله كانوا جايبين هدايا لينا، وأمي قاعدة جنب سلوى اللي كانت بتضحك وتتكلم عادي جداً، وكأن مفيش أي حاجة حصلت.
كنت كل ما عيني تيجي في عينها أحس بغصة في قلبي، وأرجع أفتكر العقد، وأقول لنفسي إزاي أختي تعمل فيا كده؟
لكن المفاجأة الحقيقية لسه مكنتش حصلت.
بعد ما العزومة بدأت والناس اتجمعت، قام جوز سلوى من مكانه، وكان ماسك علبة هدايا كبيرة ومتغلفة بشكل شيك.
ابتسم وقال بما إن النهارده مناسبة غالية علينا كلنا، أنا جايب هدية لريهام وجوزها، وكنت عايز أقدمهالهم بنفسي.
الكل بدأ يبتسم ويشكره، لكنه فجأة رفع صوته وقال بس قبل ما أديهم الهدية، عايز كل الموجودين يفتحوا عينيهم كويس على المفاجأة اللي جواها.
استغربنا كلنا، وجوزي بصله وقال خير يا صاحبي؟ إيه الحكاية؟
قرب من الترابيزة وحط العلبة قدامنا وقال افتحوا الهدية دي.
جوزي مد إيده وفتح العلبة، وأول ما الغطا اتشال، حسيت إن الدنيا بتلف بيا!
كان العقد!
نفس العقد اللي اختفى من بيتي، بنفس الفصوص والتصميم، وبنفس اللمعة اللي كنت بحفظها من كتر ما كنت بتفرج عليه.
شهقت من الصدمة، وسلوى قامت من مكانها مرة واحدة، ووشها اتغير تماماً.
أما جوزي، فبص لجوزها وقال ببرود طبعاً كلكم مصدومين، وأنا كمان اتفاجئت زيكم لما عرفت إن مراتي بتحتفظ بحاجات مش بتاعتها!
سلوى شهقت وقالت إنت بتقول إيه يا أحمد؟!





