ملك ياسين ج١
/ عاملة ايه يا رغد
_ كويسة
/ رغد … نهاية اللى احنا فيه دا ايه.
_ طلاق ، نهايته طلاق يا عمر
عمر بغلب : يا بنت الناس ليه عايزة توصلينا لكدا بس ، ليه مش عايزة تدى نفسك ولحياتنا فرصة
رغد ببرود: قولتلك انا حياتى مش معاك .. بقولك يا عمر من الاخر كدا انا مش بحبك ومش عايزاك وانت عارف كدا كويس وانى اتجبرت عليك ، فبلاش جو الصعبانيات دا وياريت تسمع الكلام وتطلقنى
عمر بألم: عندك حق يا رغد احنا مش هينفع لبعض ، حبى ليكى لو هيعشنى فى ذل كدا يبقى بلاش منه
” رغد للحظة اتضايقت من كلامه بس محبتش تبين دا فكمل عمر وقال :
اول ما أنزل من الإجازة هطلقك يا رغد
رغد بلهفة : بجد وانت هتنزل أمتى
” حس بلهفتها ودا وجعه جدا ، فقال : شهر .. بعد شهر هنزل واطلقك ، مش هكلمك تانى يا رغد وهتجنبك تمام كدا
رغد بفرحة : تمام اوى
” قفلوا مع بعض .. الفرحة والحزن ميسطرين عليهم ، اتمنت تتطلق منه واهى أمنيتها بتتحقق ، وهو كان بيتمنى تديله فرصة وتجرب حبه ليها بس للاسف رفضته ..
_______________&
” صحيت فى نص الليل .. مشيت بهدوء ناحية التسريحة وكان فى فى ضوء خفيف فى الاوضة ودا بسبب أن القمر كان مواجه ليها .. قعدت على الكرسى وفتحت الدرج وخرجت المقص .. فردت شعرها الطويل والغزير ورا ضهرها ، ملست عليهم بحب وتيه ومسكت شوية منهم .. وبكل عنــ,,ـــــف مقصت المقص وابتدت تقص فيهم بغضب .. انتهت منه وبصت لنفسها بشرود وهى شايفة شعرها اللى كان طويل وبيسحر اى حد بيشوفه قصير قدامها ومش متظبط ، مسحت دموعها بعنــ,,ـــــف وقالت بجمود :
هخلص من اى حاجة كنت بتحبها .. هخلص من ملك نفسها اللى كانت بتعـ,,ــــشقك يا ياسين .. هخلص من حبك جوايا ومن كل حاجة تخصك ..
__________________&
#يتبع
#الحلقة_الرابعة
/ كابتن ياسين
: خير يا نورا .. فى حاجة
/ فى راكبة على الطيارة مصرة تنزل منها ومش قادرين نمنعها
: افندم ، ليه مالها دى
/ مش عارفة فجأة كدا نادت عليا وقالتلى أنها عايزة تنزل وبتعيط جامد
: طب تعالى خدينى عندها
” اتجه ياسين مع نورا لعند البنت دى … اندهش من هيئتها ، باين عليها الخوف والذعر ، بتعيط جامد وجسمها بيترعش .. قرب منها براحة وقال بهدوء :
اهدى يا انسة ، فى ايه مالك
” رفعت البنت وشها ليه وهو رجع لورا … فى لحظة نظرة عيونها الخايفة خطفت قلبه .. بلع ريقه بتوتر وقرب تانى وقال وهو بيحاول يطمنها :
ممكن نهدى شوية وتقوليلى مالك
_ خ خايفة .. عايزة انزل من الطيارة ارجوك
: انتى اول مرة تركبى طيارة صح ؟
” هزت راسها بنعم وهو كمل : تمام فهمتك .. بصى مش عايزك تخفى ، اقعدى مكانك واربطى حزام الامان ، اسمعى اى حاجة مثلا ، اسمعى قران او غمضى عيونك وعدى من ١ ل١٠٠ ومتفتحهاش غير لما تسمعى صوتى بيقولك فتحى عيونك تمام
_ هتقعد جنبى؟
: للاسف أنا الطيار … بس متخافيش هخلى نورا تقعد معاكى
نورا : كابتن ياسين
” برقلها بتحذير وكمل : تمام اتفقنا .. نورا هتفضل جنبك اوكى
” هزت راسها بنعم وهى بتحاول تطرد الخوف اللى جواها .. قعدت مكانها وخرجت الهيد فون وشغلت قران على اكتر سورة بتحبها “ياسين” غمضت عيونها واندمجت مع السورة وشوية شوية حست بالأمان والخوف بينطرد من جواها ..
اما ياسين فقعد مكانه فى قيادة الطيارة وهو بيحاول ياخد نفسه ، نظرة عيونها بتطارده ، ابتسم بسخرية وقال :
والله شكلنا كدا أنا والطيارة هنقع
” بعد لحظات أعلن ياسين عن وصول الطيارة ، خلع الحزام وجرى فورا لعندها ، لقى نورا قاعدة وماسكة أيدها .. حاول يكبت ضحكته وشاورلها تقوم من جنبها .. قعد مكان نورا وساب مسافة بينه وبينها ، حمحم بهدوء وقال :
فتحى عيونك
” فتحتها ببطىء وبصتله .. ابتسمت بخفوت واتعدلت من مكانها وهو قال بابتسامة :
حاسة بالأمان دلوقتى ؟
” ابتسمت وقالت بصدق : اول مرة احس بالامان فعلا وانا فى مكان لوحدى
: طب الحمدلله .. تقدرى تنزلى دلوقتى من الطيارة وانتى مطمنة
” قاموا مع بعض ونزلوا من الطيارة .. ياسين كان مستغرب نفسه من اللى بيعمله ، بس كان حاسس أنه مبسوط وهو بيعمل كدا .. وقفوا قصاد بعض فى صالة المطار وقالت بابتسامة :
شكرا يا كابتن انك طمنتنى ، وفعلا شغلت قران على اكتر سورة بحبها واطمنت
ياسين بابتسامة : سورة ايه بقى
_ ياسين .. بحب السورة دى اوى بجد
” ابتسم ياسين باتساع وقال :
يا محاسن الصدف .. معاكى كابتن ياسين
_ بجد؟ دى فرصة سعيدة فعلا
: احم ، طب وانتى اسمك ايه
_ اممممم ، لا مش هقولك دلوقتى ، يمكن تحصل صدفة ونتقابل تانى وساعتها هبقى اقولك أسمى
” قالت اخر جملة وهى بتمشى فقال ياسين بصوت عالى :
كنت حابب اعرف اسمك عشان احتفظ بيه جوايا علفكرة
” وقفت مكانها ولفتله وقالت بابتسامة رقيقة :
ملك .. أسمى ملك يا كابتن ياسين
” فاق من ذكرياته واتنهد بعمق .. بص لايده المربوطة بشاش وضحك بسخرية .. اخد حاجته ونزل لتحت لقيها قاعدة مع مامته فى المطبخ وهما بيعملوا الاكل ..
_ بس يا ماما وكدا تبقى صينية البطاطس بالفراخ جاهزة كمان
حنان : وانا خلصت صينية البشاميل كمان والسلطات جاهزة واممم
ملك بضحك : خلاص يا ماما كل حاجة قربت تخلص خلاص … عارفة أنا متحمسة اوى انى اشوف اهلى وكمان قالولى فى ضيف جاى معاهم مخصوص عشان يشوفنا فبجد الفضول هياكلنى عشان اعرف مين هو
حنان بطيبة : ربنا يسعدك يا حبيبتى
ملك : يارب يا ماما
حنان : ملك حبيبتى هن انتى ليه لابسة الطرحة .. مفيش حد بيدخل هنا خالص ولو فى حد جاى الحرس بيبلغونى الاول
ملك بتوتر : ع عادى يعنى يا ماما انا مرتاحة كدا
حنان : على راحتك يا بنتى
” استغرب ياسين فعلا لدا .. بصلها بعمق وشرود .. استوعب لشىء وجرى على فوق على فوق بسرعة
دخل اوضتها وفتح درج التسريحة وخرج المقص ، شاف عليه بقايا شعر ، قلبه دق بعنــ,,ـــــف وغمض عيونه للحظة ، فتحها براحة وراح ناحية الباسكت”سلة المهملات” ، بص جواها وعيونه اتسعت بصدمة وهو شايف شعر مقصوص .. قعد على رجله بإهمال ومسك الشعر وبصلهم بوجع ، دموعه نزلت وقال :
ليه … ليه يا ملك تعملى كدا لييييه
يارب .. يارب وصلتها ازاى كدا ، ازاى خليتها تقص شعرها اللى كانت بتحبه ازااااى
” انتبه لفتحة الباب والتفت بسرعة وكانت ملك واقفة وبتبصله باستغراب .. قام وهو ماسك الشعر فى أيده وهى اتخضت اول ما شافته ماسكه … بصو لبعض وكأن الاتنين حاسين ببعض وافتكروا نفس الذكرى..
: ملك هانم ممكن اسالها ايه اكتر حاجة بتحبها فيها
_ امممم ، ممكن اكتر حاجة بحبها فيا هى شعرى
: ودا ليه بقى
_ ماما دايما بتقولى ، شعرك طويل يا ملك زى شعر الاميرات ، ناعم ، حرير ، لونه بنى وحلو ، بيسحر اى حد بيشوفه ، حببتنى فيه اوى وبقيت بحاول على قد ما اقدر احافظ عليه
: يبقى اكيد انا كمان هحبه علفكرة
_ دا كدا كدا يا كابتن
” قبلها ورفع الشعر فى وشها وقال بنبرة حادة مصحوبة بالم : عملتى كدا ليه يا ملك … قولتلك متقصهوش مسمعتيش الكلام ليه ، لييييييه يا ملك
” ردت بوجع وقالت : انا حرة … شعرى وانا حرة فيه ، ولا اقولك لا ، انا كرهته اصلا ، طول ما هو طويل كدا هيفكرنى بيك وبحياتى القديمة ، وانا مش عايزة اى حاجة تفكرنى بيك يا ياسين
” رمى الشعر من أيده ومسكها من كتافها وهزها بعنــ,,ـــــف وهو بيقول :
انتى مجنونة ، مجنونة يا ملك بتخلصى من الحاجة اللى بتحبيها عشان تنسينى بيها ، انتى كدا بتقهرينى معاكى يا شيخة
” فلتت نفسها منه وقالت بكره واضح :
مش قد القهر اللى جوايا منك
” كلامها عصبه ودا خلاه يزيح كل اللى على التسريحة بغضب وصرخ فى وشها ب:
القهر الحقيقى هو اللى فيا منك ، انتى واحدة مخادعة وخاينة ، متستهليش حبى ليكى اصلا .. انتى .. انتى واحدة قلبك دا يستحق أنه يتساب يا ملك
” اتصدمت من كلامه وقالت : انت بتقول ايه .. انا خاينة ومخادعة ؟ انا عملت ايه خلاك تقول عليا كدا اصلا … رد عليا ياسين
ياسين بجمود : عايزة تعرفى .. تمام هقولك ، هقولك أن انتى طلعتى بتخدعينى وبتكذبى عليا عشان توصلى لهنا .. هقولك انك رسمتى عليا البراءة والحب عشان تكونى جنبه وتشوفيه دايما
” رمشت بعدم تصديق وقالت : اكون جنب مين بالظبط ؟ وضح كلامك يا ياسين
ياسين بقسوة : عشان تكونى جنب …
