ماغي الشربيني

ماجي الشربيني من بورسعيد.. 31 سنة، متزوجة وحامل في الشهر الثامن.. ماجي طلعت في لايف وهي في حالة انهيار شديدة جدًا، وبدأت تحكي عن المشاكل والخلافات اللي بينها وبين جوزها وحماتها، وقالت إنها كانت متحملة كتير جدًا.. متحملة كلام، واتهمامات، وتدخلات، وحاجات كتير كانت بتعديها على أمل إن في الآخر يبقى جوزها وولادها معاها

ولكن ماجي في وسط كلامها كانت بتلمح بكلام غريب ومقلقَ أنها تعبت من الدنيا وتعبت من الحياة وعاوزه تسيبهالهم يشبعوا بيها.. وأنها كل ده متحملة عشان عيالها وبيتها ميتخربش.. متحملة تلقيح.. متحملة رمي بلاء.. متحمله ضغوطات نفسية كتير.. على أمل إن معايا جوزي وعيالي.. طالما هما بخير مش مشكلة أنها تخسر

لكن الصدمة الأكبر بالنسبة لها كانت إنها وصلت لمرحلة حست فيها إن جوزها نفسه بقى ضدها، وإن الخلافات بينهم وصلت للكلام عن فيديوهات لخناقاتهم، وذكرت في اللايف أسماء أشخاص واتهمتهم بتهديدها بنشر مقاطع خاصة

وهي في حالة انهيار قالت: «أنا مش مسامحة.. ومش غافرة.. وإنتي يا سحر هقف أنا وإنتي قدام وجه كريم.. ومش مسمحاكي يا سحر.. ومش مسمحاك يا محمد.. وذنب وذنب عيالي في رقبتكم ليوم الدين»

وبعد اللايف والحالة اللي كانت فيها، حصلت الواقعة المؤلمة.. ماجي سقطت من شرفة منزلها، وتم نقلها للمستشفى لتلقي العلاج.. والأصعب من كل ده إنها كانت حامل في الشهر الثامن

ماجي تعرضت لإصابات وكسور، وخضعت للرعاية الطبية، وتمت متابعة حالة الجنين بشكل مستمر بسبب خطورة وضعها الصحي

وفي البداية كان فيه كلام عن إمكانية إجراء ولادة عاجلة للحفاظ على سلامة الأم والجنين، لكن بحسب المتابعات اللاحقة استقرت حالتهما، وتم تأجيل الولادة لعدم وجود ضرورة طبية طارئة في الوقت الحالي

أما الاتهامات اللي قالتها ماجي في اللايف ضد جوزها ووالدته وآخرين، فدي كلها لسه محل الفحص والتحقيقات
.

لكن بعيدًا عن مين غلطان ومين مظلوم.. إحنا قدامنا إنسانة وصلت لمرحلة قالت فيها إنها مش قادرة تستحمل أكتر من كده، لأن كل الي كان بيعينها ويصبرها ع الحياة انقلب ضدها وبقا يهددها ويبتزها عن طريق صحفي فضايح اسمها “إيهاب زيدان” الي خاض في عرض ماجي ونشر فيديوهات لخناقاتهم ومشاكلهم عشان يساومها بيهم

منهم لله أي حد يوصل إنسان للمرحلة دي.. و أي حد يستغل مشاكل زوجين ويدخل بينهم بدل ما يحاول يصلح.. ومنه لله أي زوج لو ثبت إنه ساب مراته تواجه كل المشاكل لوحدها، أو شارك في إيذائها أو سمح بإهانتها وتهديدها

أنا لا ببرر للي ظلمها أو أذاها، ولا بنبرر اللي حصل منها.. لكن كان فيه روح بريئة جوه بطنها تستحق إنها تعيش

فـ مينفعش الي حصل دا يعدي من غير ما نقول كلمة الحق ونعظ الناس بما يرضي الله ورسوله.. ماجي تتحمل جزء من المسؤولية عن اللي حصل، لأن مهما كان حجم الألم والضغط، النفس أمانة، والبيبي اللي في بطنها ملوش أي ذنب إنه يتعرض للخطر والهلاك ويدفع تمن مشاكل الكبار بدون ماهو يختار مصيره.. ربنا قال: ﴿وَلَا تَقْتُلُوا أَنفُسَكُمْ ۚ إِنَّ اللَّهَ كَانَ بِكُمْ رَحِيمًا﴾

عيالكم ذنبهم إيه؟! البيبي الي فالتامن ولسه مشافش ولا عرف معني الحياة.. ذنبه ايه انه يتعرض لكل الألم والترويع دا وكان ممكن يفقد حياته بسبب الي حصل.. أطفال مالهمش أي ذنب في مشاكل الكبار.. لا ذنبهم يشوفوا أمهم بالحالة دي، ولا ذنبهم يتحرموا منها بسبب خلافات كان المفروض الكبار يعرفوا يحلوها بعيد عنهم

الخلافات بتحصل في كل بيت.. وده طبيعي.. لكن لما الخلاف يتحول لإهانة وتهديد وابتزاز ونشر خصوصيات وفيديوهات، الموضوع مبقاش محض مشاكل عائلية.. الموضوع بقى أخطر من كده بكتير

وربنا قال: ﴿وَلَا تَنَازَعُوا فَتَفْشَلُوا وَتَذْهَبَ رِيحُكُمْ﴾

ربنا ينجي ماجي ويكتب لها السلامة، ويحفظ جنينها، ويعدّي عليها الأزمة دي على خير، ويردها لبيتها وأولادها سالمة معافاة..

لمشاهده الفيديو في الصفحه الثانيه