خمس رجاله في حياه الهام شاهين
جوزها الأولانى خانها مع سهير رمزي. وفي الجوازة التانية العصمة كانت في إيديها. وعاشت قصة حب مع مليونير مسيحي.. واتخطبت لإخواني مشهور. وعشقت واحد أكبر من أبوها.
قصة 5 رجالة في حياة إلهام شاهين
أول مرة اتجوزت فيها كانت من رجل الأعمال عادل حسني.. وكان بتاع سياحة وعنده شركة. وحبته رغم إنه أكبر منها بـ25 سنة
وعاشوا مع بعض سنتين لحد ما قرت في الجرنان خبر بيقول “عادل حسني بينتج فيلم”..
وبعدها سألته: “عادل هو إنت بتعمل فيلم؟”.. رد وقالها: “بقى أنا عايز أخرجك من الوسط ده أقوم أنا اللي أدخل؟!..
إنتي بتهزري”
وقبلها كان بيلح عليها عشان تسيب الشغل وتخلف وتقعد في البيت
وإلهام صدقته. لكن صحابها كلهم قالولها: “والله جوزك بينتج فيلم”.. وبرضه رد وقال: “محصلش”.
بس لما الفيلم قرب ينزل والأفيشات تظهر في الشوارع قرر يصارحها وخدها في ليلة وفضل يلف بالعربية في الشوارع وفي الآخر اعترف وقالها:
“أنا قلتلك أنا مابنتجش.. لكن الحقيقة أنا أنتجت فيلم وهي مرة وخلاص”.
وكان الفيلم لسهير رمزي.. واسمه “الخادم”.
إلهام شاهين دبت خناقة..
لكن الميه رجعت لمجاريها بعد شوية.
ومرة تانية قرت إنه بيعمل فيلم لسهير رمزي واسمه “نساء صعاليك”..
ولما سألته.. قالها: “إنتي مجنونة.. ما خلاص خلصنا.. معرفش بتجيبي الكلام ده منين”.
وحظه الأسود إنها نزلت بعدها تصور ف ستديو الأهرام..
وفي يوم جالها صحفي وقالها: “يا أستاذة ممكن آخد منك كلمتين.. أنا لسه عامل دلوقتي موضوع مع الدكتور عادل حسني.. وهاخد الموضوعين جنب بعض”.
إلهام سألته: وإنت شفت الدكتور عادل فين.. رحتله الشركة ولا إيه؟
رد وقالها: لا شفته في ستديو نحاس.
إلهام استغربت وسألته: والدكتور عادل حسني بيعمل إيه هناك؟
الصحفي قالها: أنا قابلته بالصدفة في أوضة سهير رمزي.. كنت رايح أعمل معاها لقاء وقابلته.
سألته: الكلام ده إمتى؟.. قالها: لسه كنت هناك من دقايق.
ونزلت إلهام شاهين جري بجلابية مقطعة وشبشب بلاستك كانت بتصور بيهم.. وخدت العربية وراحت ع استديو نحاس..
ولما وصلت لقت عربية جوزها واقفة عند باب الممثلين.
والسواق بتاعه أول ما شافها جري يقوله: “كبسة يا عادل بيه”.
ودخلت إلهام على أوضة سهير رمزي.. ولسه بتفتح الباب لقته في وشها.
وأول ما شافها حط إيده على بقها وشدها لحد العربية.. وسألها: عايزه ايه؟
قالتله: نطلق.
وبالفعل اطلقوا.. وساعتها كانت حامل وأجهضت نفسها.
