مبخلفش امانى سيد

موافقة إنك ترجعي. بصيتلها باستغراب، وقلت موافقة؟! هو إنتِ فاكرة إني جاية أستأذنك عشان أرجع؟
ضحكت وقعدت على الكنبة المقابلة ليا وقالت لا طبعًا، بس واضح إنك مش مستوعبة إن واحدة ممكن توافق إن جوزها يرجع طليقته تعيش معاها في نفس البيت، بس أنا عندي أسبابي. قلت لها بحدة وأسبابك دي إيه بقى؟
بصت لفيصل، وبعدها رجعت بصتلي وقالت عارفة أنا وافقت ليه؟ عشان أنا مش هفضل طول عمري شايلة مسؤولية راجل وطفلين وبيت لوحدي، أنا لسه صغيرة ومن حقي أعيش وأخرج وأسافر وأهتم بنفسي، مش أفضل طول اليوم بين المطبخ والعيال وطلبات جوزي. وجودك هيريحني من حاجات كتير.
فضلت باصة لها وأنا مش مصدقة وقاحتها، فقالت وهي بتكمل وبعدين إنتِ كنتِ مراته قبلي، وعارفة هو بيحب إيه وبيكره إيه، يعني مش محتاجة أعلمك حاجة، وهتكوني بتساعديني في تربية الولاد كمان. بصيت لفيصل وقلت وإنت موافق على الكلام ده؟
اتدخل بسرعة وقال هبة قصدها إنكم تساعدوا بعض، وكل واحدة فيكم ليها حقوقها، ومحدش هيجي على التانية. واعتبرى العيال ولادك مانتى كده كده مابتخلفيش رجعت بصيت لهبة وقلت طب وإنتِ شايفة إن أنا هرجع عشان أساعدك في شغل البيت وتربية عيالك؟
هو أنا كنت ناقصة شغلانة؟ابتسامتها اختفت للحظة، لكنها سرعان ما رجعت وقالت إنتِ بتفهمي الكلام غلط يا جيهان، أنا بقولك إننا ممكن نعيش مرتاحين، وكل واحدة تاخد اللي هي عايزاه.
ساعتها حسيت إن الموضوع أكبر من مجرد رجوعي لفيصل، وإن ورا موافقتهم دي حكاية تانية خالص، حكاية أنا لسه معرفش عنها حاجة. وغير كده ازاى هى مش بتغير من إنه يحنلى مثلا
بصيت لهبة شوية، وبعدها سألتها بهدوء طب مش خايفة إنه يحنلي؟ أو مع الوقت ينسى إنك مراته ويبدأ يميل ليا تاني؟ضحكت هبة ضحكة قصيرة، وقالت بمنتهى الثقة يحن إيه بس يا جيهان؟
هو لو بيحبك كان سابك على ذمته من الأول، مش كان طلقك واتجوزني وخلف مني كمان! إنتِ لسه عايشة في وهم الحب، وفاكرة إن فيصل ممكن يكون مستني فرصة عشان يرجعلك. اتنهدت وكملت وهي بتبصلي من فوق لتحت بصي يا حبيبتي، أنا مش داخلة معاكي في منافسة، ولا شايفة إنك ممكن تاخدي مني حاجة، أنا مراته وأم ولاده، وإنتِ مجرد طليقته، والفرق بينا كبير.
الكلام وجعني، مش عشان هي قالت إني مجرد طليقته، لكن عشان كانت بتتكلم وكأنها ضامنة إن وجودي في حياتهم هيكون لمصلحتها هي وبس. بصيت لفيصل وقلت وإنت يا فيصل، ساكت ليه؟ عاجبك الكلام ده؟رد بتوتر هبة مش قصدها تضايقك، وإحنا عايزين نبدأ صفحة جديدة.
ضحكت بسخرية وقلت صفحة جديدة؟ إنتوا مش عايزين تفتحوا صفحة جديدة، إنتوا عايزين ترجعوني أعيش في بيتكم عشان أكون خدامة لمراتك وأولادها، وكل واحد فيكم يضمن مصلحته. هبة اتعدلت في قعدتها وقالت خدامة مين بس؟
هو إنتِ فاكرة نفسك هترجعي ملكة متوجة؟ أنا بقولك إننا هنقسم المسؤوليات، وبعدين إنتِ مش عندك أطفال ولا مسؤوليات، يعني وقتك فاضي. بصيتلها بذهول، وقلت آه، كده فهمت… إنتِ مش خايفة إني أخد جوزك، إنتِ مطمنة إنك هتاخدي مني وقتي ومجهودي، وتعيشي إنتِ حياتك براحتك.
ساعتها ملامحها اتغيرت، وفيصل قام من مكانه وقال بعصبية خلاص يا جيهان، إنتِ هتوافقي ولا لأ؟ عشان أنا مش فاضي للكلام الكتير ده. بصيتله بثبات وقلت وإنت مستعجل ليه أوي يا فيصل؟ هو في حاجة مستنياها ومش هتتم غير لما أرجع؟
فيصل بص لهبة بسرعة، وهي بدورها بصتله، والنظرة اللي اتبادلت بينهم خلتني أتأكد إن فيه حاجة مستخبيّة عني. قلت وأنا بحط إيدي على شنطتي أنا مش هتحرك من هنا غير لما أفهم إنتوا عايزيني أرجع ليه بالظبط، لأن محدش فيكم أقنعني لحد دلوقتي إن الموضوع لمصلحتي.
هبة اتكلمت بنفاد صبر يا جيهان، هو لازم كل حاجة يبقى وراها مؤامرة؟ أنا ست زيك، وعندي طفلين، ومن حقي أرتاح شوية. وبعدين إنتِ مش هتخسري حاجة، هترجعي لجوزك وبيتك، وإحنا هنعيش كلنا مع بعض.
رديت عليها بس أنا مش أم ولادك يا هبة، ولا مسؤولة عن تربيتهم، ومش مضطرة أرجع عشان أشيل عنك مسؤولياتك. ضحكت وقالت ما هو ده اللي مش قادرة تفهميه، أنا مش طالبة منك تشيلي مسؤوليتهم، أنا بس عايزاكي تبقي موجودة، وفيصل مش هيقصر معاكي.
بصيت لفيصل وقلت طيب سؤال أخير، لو أنا وافقت ورجعت، هتكون معاملتك ليا إيه؟ هتعتبرني زوجتك زي ما كنت زمان، ولا هتكون مجرد واحدة عايشة في بيتك وخلاص؟رد بسرعة طبعًا زوجتي، وإنتِ ليكي حقوقك كاملة. وحقوقي دي هتكون إيه؟ هتقسم وقتك بيني وبين هبة؟
ولا أنا هرجع عشان أكون موجودة وقت ما تحتاجني، وأختفي وقت ما تكون عايز تعيش حياتك معاها؟فيصل اتنرفز وقال إنتِ ليه مصممة تصعبي الموضوع؟ أنا بقولك هرجعك لبيتك، مش باخدك من الشارع!وقتها مقدرتش أمسك نفسي وقلت بيت مين يا فيصل؟
البيت اللي طردتني منه يوم ما عرفت إني مش هقدر أخلف؟ البيت اللي قلتلي فيه اتكلي على الله وخدي عفشك؟ دلوقتي افتكرت إن ليك طليقة اسمها جيهان؟هبة قامت من مكانها وقالت خلاص بقى، هو إحنا هنفضل نسمع في الكلام ده كتير؟
لو مش عايزة ترجعي قولي، لكن متفضليش تعايرينا بالماضي. بصيتلها وقلت أنا مش بعاير حد، أنا