رواية الغرباء كاملة بقلم حماده هيكل

كاملة
من فترة كنا عايشين في مدينة جده في السعودية .. والدي جاله إنتداب في مدينة هناك إسمها نجران في المملكة … مدينة جميله و هاديه
للي مايعرفهاش …. نجران هي العاصمة الإدارية لمنطقة نجران في جنوب السعودية .. مشهورة بالزراعة … النخل منتشر في كل مكان … أشهر معالمها سد وادي نجران أحد أكبر السدود في الجزيرة العربية.. بالإضافه للمنطقة الأخدودية التي ورد ذكرها في القرآن الكريم في سورة البروچ .. جبالها ماليانه بالمواقع الأثرية والنقوش المتنوعة اللي مرسوم عليها تاريخ حضارات قديمة ترجع ل ٤٠٠٠ سنة قبل الميلاد.
فترة الأعدادي ..كنا في مدرسة جميلة صورة مصغره من المدينة .. صغيرة و هادية و جميلة ..
الفصول واسعة و نضيفة و منظمة و كل فصل فيه تكييفين و مروحة سقف.
بالإضافه طبعا ل شباكين على سور المدرسة و شباك على الطرقه الداخلية
المهم .. طباع الناس في نجران هادية … كل واحد في حاله .. فيهم حبة طيبة كده تحسها في كلامهم و تصرفاتهم و تعاملاتهم و ملامحهم .. و طبعا كان ابنائهم اللي معايا في الفصل بنفس الطباع.
بس كان معانا في الفصل مجموعه من ٦ تلاميذ مختلفين تماما عن أي حد فينا .. أو حتى عن سكان المدينه .. او يمكن مختلفين عن أي حد قابلته حتى بعد كده … 
طباعهم غريبة .. 
مع نفسهم .. 
مابيكلموش حد .. 
مابيحتكوش ب حد ..
مابيتعاملوش غير مع بعض .. 
مابيسألوش .. 
مابيجاوبوش على أسئلة .. 
نظراتهم غريبة جدا و حادة ..
كلامهم بصوت واطي .. و بطئ .. شبه مش مفهوم .. ألفاظ غريبة .. 
كنا بنلاحظ ساعات انهم بيعكسوا بعض الكلمات .. 
و ساعات بيعكسوا الجمل .. 
أو بينطقوها بترتيب غريب .. 
محدش فينا كان فاهم ليه .. 
شكلهم غريب .. تحس ملامحهم رجاله كبار .. مش في اعدادي خالص
بس كنا عارفين إنهم كلهم من عيلة واحدة كبيرة في نجران 
اللي عرفته فيما بعد ان العيلة ديه أصلها من أكبر قبائل نجران … 
و كانوا مشهورين بالسحر
كل ده كان عادي ..
احنا بندخل الفصل .. و هما ورانا .. من كتر انعزالهم عننا مابقيناش نهتم أوي بتصرفاتهم الغريبه … خلاص .. هما ف حالهم و احنا ف حالنا.
في يوم .. قبل نهاية الترم الأول بإسبوعين .. كنا واقفين وقت الفسحه في الملعب بنتكلم و نهزر … مش فاكر ايه اللي جاب سيرة المجموعة الغريبة اللي معانا بس اللي فاكره كويس ان كان معانا ولد شاطر و محبوب و اجتماعي .. إسمه محمد كان فيه كره شديد بينه و بين المجموعه ديه. في نفس الوقت كان فيه نظرات حادة جدا مليانه كره و اڼتقام و متوعده من المجموعة ديه ل محمد ..
زي مايكونو بيقولوله أصبر .. هاتشوف أو مش هانسيبك.. محدش فينا