عروسة بورسعيد

شوف يا سيدى لو لسة متعرفش اللى حصل لعروسة بورسعيد اللى قصتها قالبة الرأى العام حاليٱ تعالى أما احكيلك القصة كاملة !
البنت اللى فى الصورة إسمها فاطمة ياسر عندها ١٦ سنة من حى الزهور ..من شهور اتخطبت لشاب إسمه محمود وهو اللى قدامك فى الصورة وكانت الخطوبة مستقرة وبشهادة أهل المرحومة فاطمة إنه كان بيحبها أوى ومتعلق بيها لكن ….؟
بيعكر صفو العروسين بنت من عيلة العريس إسمها شهد ( شهد بنت أخت محمود ) سنها تقريبا فى سن فاطمة بس شهد كانت تصرفاتها غريبة أوى مع خالها يعنى كانت تتعمد تتدخل بينه وبين فاطمة ولو راح لها زيارة تفضل تتصل بخالها بإستمرار وبشكل يثير التساؤلات ولو رد عليها تتخانق معاه !!
..المؤشرات بتقول ان شهد غيرانه على خالها من عروسته فاطمة حتى ان حصل خلاف بسيط بينها وبين فاطمة بس انتهى بالصلح ولذلك فاطمة كانت مستاءة من تصرفات شهد ولو اتصلت بمحمود وهو عند فاطمة كانت تقفل التليفون بسببها ،،
الوضع العام بيقول إن بنت أخت العريس جايز غيرانه من العروسة اللى فى سنها بس واضح ان الموضوع أكبر من كدا ..!
ييجى أول يوم رمضان فا أهل فاطمة يعزموا العريس على الفطار أول يوم وتانى يوم وعلشان عريسها يرد العزومة طلب من فاطمة وأبوها وأمها يفطروا عندهم هما تالت يوم رمضان ..
محمود ساكن فى منطقة إسمها الجناين بيت عيلة وشقته بيجهزها فى الدور اللى فوق شقة أهله ..
إستجابت فاطمة وراحت لأهل خطيبها هى وأمها لكن أبوها رفض يروح معاهم ..المهم إن السهرة طولت لحد السحور ومكنش فيه مواصلات علشان فاطمة وأمها يرجعوا فاضطروا البيات عند أهل خطيبها ..
تانى يوم الساعة ٨ الصبح الناس فى البيت تبدأ تصحى وأولهم شهد !
شهد دخلت على فاطمة وهى نايمة وصممت تصحيها ..فاطمة عبرت عن استياءها وقالت لشهد سبينى أنام من فضلك !
ومع إصرار شهد صحيت فاطمة علشان تلاقيها بتطلب منها ينزلوا يتمشوا فى الجناين وفى نفس الوقت كانت والدة فاطمة بتساعد حماة بنتها فى المطبخ ..
الاتنين ينزلوا من البيت فاطمة بصحبة شهد !
بعد نص ساعة تحصل حاجة غريبة ..شهد راجعة لوحدها وبتعيط !
البيت اتلم مالك يابنتى؟ كانت منهارة بشكل مش طبيعى وقالت انها تعبانة وراحت حضنت أمها ( أخت محمود العريس ) وفضلت تعيط وبعدين دخلت تتوضا وتصلى وتمسك المصحف بشكل غريب ..
ساعتها والدة فاطمة حست بعدم ارتياح وسألت هى فين فاطمة ؟!
كان الرد . فاطمة نايمة فادخلت أمها تبص لاقت حد ملفوف بالبطاطين ..خرجت عادى وبعد ساعة تطلب ان حد يصحى فاطمة وراحت بنفسها تصحى بنتها وتتفاجئ ان اللى ع السرير مش فاطمة !
دول شوية بطاطين واخدين شكل انسان نايم !! فضلت الأم تبحث عن فاطمة وتعلى صوتها وشوية البيت كله اتجمع ويبدأ البحث عن فاطمة ..خطيبها قال انا هاطلع أشوفها فى الشقة اللى بيجهزها للجواز وهنا حصل اللى مكنش حد يتوقعه !